LEGAZPI CITY- Sinierto kan National Food Authority Bicol na bastante an suplay nin paroy sa rehiyon.
Ini an katakod kan pagbabarewas kan ahensya nin bagas sa mga provincia na kasabay sa ipigdeklarar kan Department of Agriculture na sakop kan food security emergency on rice.
Segun ki NFA Bicol Acting Regional Manager Julie Llenaresas sa intrevista kan Bombo Radyo Legazpi na kaibanan sa mga sakop na areas an mga provincia kan Camarines Sur, Camarines Norte, Sorsogon asin Masbate.
An nasabing mga provincia an pwedesir na makipag koordinar sa Food Terminal Inc. na nasa irarom kan Department of Agriculture.
Paliwanag kan opisyal na mandato sana kan saindang opisina an distribusyon sa mga babakalon kan mga lokal na gobierno.
Napag-araman na an provincia kan Camarines Sur an igwa ng purchase order na nasa 100,000 bags.
Segun ki Llenaresas na pabor man sainda an lakdang ngani na makapag barewas na kan mga suplay huli ta kinakaipuhan na nin espasyo sa mga bodega para sa pinag-aantisiparan na panahon kan anihan.
Durante kaya kan harvest season, mas dakol na paroy pa an babakalon kan ahensya hali mismo sa mga lokal na paraoma.
