Inakusaran kan National Maritime Council an China nin pagpapakalat nin salang impormasyon nganing magkawsa nin kalibongan an saindang namamanwaan asin international community katakod sa isyu kan Sandy Cay asin ilegal na mga aktibidad sa West Philippine Sea.
Sa iniluwas na pahayag kan National Maritime Council, an pagpapakalat kan China na naagaw na ninda an Sandy Cay na parte kan Pilipinas an malinaw na halimbawa kan saindang disinformation nganing paluwason na kontrolado ninda an Sandy Cay.
Piggagamit pa suboot kan China an saindang state-controlled media nganing magkawsa nin kalibongan asin patubudon an saindang namamanwaan asin magin an international community na nakua na ninda an sarong parte kan teritoryo kan Pilipinas sa West Philippine Sea.
Kasabay kaini, inakusaran kan National Maritime Council an China sa pagkaraot kan kadagatang nasa palibot kan Pag-asa Island huli sa warang habas na ilegal na pagkumpulan kan mga barko kan China sa palibot kan Isla.
Kaiba digdi an maraot na epekto kan piggigibong pagpatindog kan China nin artipisyal na mga isla asin edipisyo sa Zamora Reef.
Segun ki Rear Admiral Roy Vincent Trinidad, tagapagtaram kan Philippine Navy for the West Philippine Sea, an pagsasadiri suboot kan China sa Sandy Cay an taktika nganing ilihis an atensyon kan publiko sa mga naarestong pigdududahang Chinese spies sa nacion asin sa suboot troll farm kan Chinese embassy sa Manila kan 2023.
 accused China of spreading false information to confuse its citizens and the international community regarding the Sandy Cay issue and illegal activities in the West Philippine Sea.){kind=link}