LEGAZPI CITY – Nakatalaang implementar liwat kan Bureau of Fire Protection Legazpi an saindang Oplan Paalala Iwas Paputok katakod kan nagdadangadang na pasko asin bagong taon.
Segun ki BFP Legazpi City Public Information Unit Chief Senior Fire Officer II Norman Andes sa intrevista kan Bombo Radyo Legazpi na katuyuhan kan nasabing implementasyon an nganing mai-halangkaw an kaaraman kan publiko mapadapit sa kasulo asin iba pang klase nin emerhensya.
Papahiguton man ninda an mga isasagibong fire safety inspections sa mga business establishments, negosyong may kinaaraman sa kalayo, asin residential compounds.
Nakikipagkoordinar pa sinda sa Lokal na gobierno nganing aramon kun sain an idedesignar na fireworks display asin fireworks selling area nganing matawan ini nin presensya kan saindang ofisina.
Pagdoon man kan opisyal na maggamit sana ngonian na holiday season nin mga dae ipinagbabawal na mga paputok o gumamit na sana nin mga alternatibong paribok arug kan torotot nganing makalikay sa peligrong dara kan mga paputok.
Magsasagibo man sinda nin mga public information campaign asin makikipagtabangan sa Local City Disaster Risk Reduction and Management Office nganing ma-impormaran an publiko asin malikayan an anumang klase nin kasulo.
Pighagad man ni Andes an tabang kan mga magurang na bantayan an saindang mga aki asin dae pagtugutan na maggamit nin paputok nganing maiselebrar nin salbado asin matuninong an pasko asin bagong taon.
