LEGAZPI CITY – Generally peaceful an nagin assessment kan mga kapulisan sa pag-obserbar kan Semana Santa sa provincia kan Albay.
Segun ki Albay Police Provincial Office Provincial Director Police Colonel Noel Nuñez sa intrevista kan Bombo Radyo Legazpi na nagin matuninong ini sa pagkalahatan sa ibong kan mga nairehistrong insidente.
Afuera sa nangyaring aksidente sa Ligao City, nakapagrehistro man sinda nin mga insidente nin pagkalamos sa Polangui asin insidente man nin salisi sa Legazpi City.
Naguno suboot ninda an katuninongan huli sa maximum deployment kan saindang mga personahes sa mga hotspot areas partikularmente na ngonian na Easter Sunday.
Punto man kan opisyal na uminabot sa poco mas o menos 800 na mga kapulisan an saindang naideploy mantang uminabot man sa 9,000 an nairehistro nindang nagpasiring sa mga terminal, simbahan asin tourist attraction sa enterong provincia.
Narisa man ninda an pagbaba sa numero kan mga turista sa Albay kumpara sa kaparehong datos sa parehong peryodo kan nakaaging taon na pwedesir na kawsa kan pagtaas sa presyo kan produktong petrolyo asin babarakalon.
Piglalaoman na madurar an deployment kan saindang personahes sagkod may turista pa suboot sa provincia asin pwedesir mag-extend nin pirang aldaw kun kinakaipuhan.
Pangapodan man ni Nuñez sa mga mapasiring sa mga beach asin salog na mag-ingat sa pagkarigus asin syertuhon na tawan nin importansya an saindang kaligtasan.
