LEGAZPI CITY – Umuran man o uminit an ipapadagos kan August Twenty One Movement an isasagibo nindang ikaduwang Trillion Peso March saaga (November 30) nganing kondenahon an mahiwasang korapsyon sa gobierno.
Segun ki August Twenty One Movement President Volt Bohol sa intrevista kan Bombo Radyo Legazpi na padagos sindang nakikipagkoordinar sa mga otoridad asin mga marshall nganing masyertong salbado an paghiro kan mga namamanwaan.
Piglalaoman man ninda na may mga grupo man suboot partikulamente na an mga suportadores ni Dating Presidente Rodrigo Duterte an maporbar na makisumaro sa mahiwasang hiro protesta alagad iba an saindang ipapangapodan.
Pagdoon niya na maski may nangyaring kariribukan asin riot sa may parte kan Mendiola kan September 21 rally an nagin matuninong an kabilugang durasyon kan naenot na Trillion Peso March kun kaya mawot nindang maipa-otob an katuninongan saaga.
Pigtaram pa kan opisyal na may mga pira pang grupo an nakikipag-olay sa saindang grupo nganing makisumaro sa saindang hiro protesta kun sain pigkakabalehan ini kan mga grupo na gikan sa manlain-laing provincia.
Bukas man suboot an saindang hiro protesta para sa mga prominenteng personalidad asin mga pulitiko na gikan sa oposisyon nganing makibale sa pangapodan kan publiko na paninimbagan sa nangyayaring korapsyon.
Paglilinaw niya man na makikisumaro si Former Vice President asin presenteng Naga City Mayor Leni Robredo sa hiro protesta alagad sa Naga City ini ma-atendir na taliwas sa mga naglalakop na impormasyon sa social media.
Pagirumdom ni Bohol sa makikisumaro sa ikaduwang Trillion Peso March na magdara nin extrang bado o jacket enkaso magraot an panahon asin pagkaon enkaso makamate nin gutom sa katahawan kan protesta.
 to condemn widespread corruption in the government.){kind=link}