LEGAZPI CITY – Nagpatanid an National Nutrition Council sa publiko sa mga helang na posibleng makua ngunyan na papaabot na naman an panahon nin tag-uran.
Sa intrevista kan Bombo Radyo Legazpi kay Arlene Reario an Director kan National Nutrition Council Bicol, tuyong panahon nin tag-uran nagluluya an immune system kan tawo huli sa exposure sa malipot na panahon kung kaya mas marikas na pigtatamaan nin helang.
Kaiba sa mga helang na ini iyo an kalintura, abo asin sipon na komon ng nakakaapektar sa mga kajovenesan na mahilig na magkawat sa uran.
Segun kay Reario, bako sana ini an mga helang na naglalangkaw an kaso tuyong tag-uran alagad maging an diarrhea, leptospirosis, malaria, dengue asin iba pa.
Patanid kan eksperto na sa pagpapaabot na tag-uran pakusogon an immune system sa paagi nin pagkaon nin masusustansyang prutas asin gulay asin pag-eehersisyo.
Kaipohan man na ibitaran an madumog nin uran sa paagi nin paggamit nin payong asin pagbalon nin pamalit na bado.VC
