LEGAZPI CITY-Inanunsyo kan Estados Unidos na pupundohon na kaini an naval blockade laban sa Iran makalihis pirmahan kan duwang nacion an sarong kasunduan na obhetong wakasan na an tensyon sa Middle East.
Susog sa US Central Command, hinale na ninda an blockade susog sa direktiba ni U.S. President Donald Trump.
Huli digdi, liwat na binuksan an Strait of Hormuz, na sarong importanteng ruta na piga-agihan kan mga barkong igwang kargang langis asin iba pang kalakal.
Napag-araman man na kairiba sa kasunduan an tulos na pagpapa-pundo kan operasyon kan US military kun masunod an Iran sa nabanggit na kasunduan.
Kairiba sa kondisyon an pagraot kan Iran sa saindang imbakan kan enriched uranium asin punduhon an pagsustento sa mga kaalyadong armadong grupo sa rehiyon.
Mantang naipaotob na an kasunduan, duda man digdi si Iran Supreme Leader Mojtaba Khamenei, asin sinabing bako saiya lubos na uyon sa kasunduan alagad tinugutan niyang ipadagos ini makalihis na masiguro kay kay Iranian President Masoud Pezeshkian.
Sinabi pa ni Khamenei na bako porque naidagos an kasunduan, masunod na an Iran sa nagkapira pang negosasyon kaini sa Estados Unidos
Mientras tanto, sinabi ni Trumo na laoman niyang susunudon kan gabos na kampo an tigil-putukan ngani magpadagos sa orolay mapadapit sa katoninongan.
Napag-araman man na nakalaag sa kasunduan an pagpundo sa anumang gera, liwat na pagbubukas kan Strait of Hormuz, pagpugol sa Iran na magkaigwa nin nuclear weapon, asin pagtatatag kan pondong maabot sa $300 billion ngani liwat pagbangon asin pagusbong kan ekonomiya kan Iran.
Sa ibong kaini, an mga pag’atake sa pag-ultanan kan Israel asin kan grupong Hezbollah sa Lebanon nagtetenir na aktibo poon kan an kasunduan ianunsyo.
Alagad an Israel nagsasabi na an mga operasyon kaini laban sa Hezbollah separado, mantang an Iran nagsasabi na an kasunduan kan Estados Unidos kabali an sarong kasunduan sa Lebanon.
