LEGAZPI CITY-Nakahandang i-deploy an nasa 1, 270 na kapulisan sa Albay kasabay kan komemorasyon kan EDSA People Power Revolution saaga, Pebrero 25.
Segun kay Albay Police Provincial Office Provincial Director Police Colonel Noel Nuñez sa intrevista kan Bombo Radyo Legazpi na nagsasagibo na sinda nin police visibility asin police presence ngani masierto an deployment asin monitoring kan mga isasagibong aktibidad.
Padagos man an saindang anti-criminality campaign asin pagmamatenir kan traffic asin road security kasabay an augmentation kan ibang mga ahensya kan gobierno.
Kabale man digdi an saindang PNP unit, mobile patrol, asin intel monitoring sa mga concerned areas, kasabay an saindang mandato nin checkpoint enforcement, border control asin cover security.
Pig-preparar naman suboot ninda an mga motorcycle patrol na maalalay sa mga magma-martsa.
Kasunod kaini, pigpapagirumduman an publiko na magin mapagmatyag sa palibot, ibitaran an pagdara nin matutulis na bagay, siring man na magsunod sa mga itinakda na traffic advisory ngani masierto an seguridad asin maibitaran an aksidente.
