Sinimbag kan nagkapirang opisyales kan gobyerno an mga patutsyada ni Bise Presidente Sara Duterte.
Ngunyan na semana kan magpaluwas nin mensahe ni Duterte na nagkukwestiyon sa suboot palpak na paggamit nin pondo kan gobyerno asin pagpalyar na masimbagan an problema kan mga Pilipino.
Alagad segun kay Alliance of Concerned Teachers Partylist Rep. France Castro, si Duterte an dapat na kwestiyonon sa salang paggamit nin pondo partikular na sa P125 milyon na confidential funds na inubos kaini.
Tinawang duon ni Castro na antes na magkwestiyon sa iba mas maray kung maipapaliwanag muna kan Bise Presidente an mga anomaliyang pigkakaimbweltohan kaini.
Para man kay House Assistant Majority Leader Raoul Manuel, kaduda-duda kung nata ngunyan pa sana nagkukwestiyon si Duterte maski na wara man ini nin naginibo ngani na mapundo an suboot salang paggamit nin pondo.
Nagsimbag man maging si Senate Presidente Chiz Escudero sa pahayag ni Duterte na wara nin plano an administrasyon ni Presidente Ferdinand Bongbong Marcos Jr. para sa mga pagbaha sa nasyun.
Segun kay Escudero, igwa nin anom na taon an ama ni Sara na si dating Presidente Rodrigo Duterte na solusyonan an problema sa baha, alagad dae man ini nasimbagan.
Mientras tanto, wara pa nin pigpapaluwas sa ngunyan na pahayag si Presidente Marcos sa mga patutsyada kan Bise Presidente.
