LEGAZPI CITY—Nabalot nin abo an nagkapirang lugar sa banwaan kan Camalig, Albay makalihis an nangyaring ashfall dara kan nagpapadagos na aktibidad kan Bulkang Mayon.
Segun ki Bureau of Fire Protection Camalig Municipal Fire Marshal Fire Inspector Warren Orendain, sa intrevista kan Bombo Radyo Legazpi, kabale sa mga apektadong lugar an mga barangay kan Anoling, Cabagñan, Tumpa, Sua, Salugan, Quirangay magin an Barangay 1-7 Poblacion, Sumlang, Gapo, Tinago, Ilawod, Libod, Tagaytay asin Bariw.
Tulos man na nagkundusir flushing operation an saindang opisina partikularmente na sa pasiring sa sentro kan banwaan, siring man an pagbarewas ninda nin face masks kaiba an Municipal Disaster Risk Reduction Management Office.
Dugang kan opisyal na en kaso man na maglala an sitwasyon an igwa sindang contigency plan asin pwedesir man sindang maghagda nin augmentation nin mga personahes gikan sa ibang istasyon o anuman an magigin disposisyon kan saindang higher offfice.
Mientrastanto, mensahe man ni Orendain sa namamanwaan na apektado kan ashfall na magsunod sa ipigpapaotobkan gobierno asin magtinir sana sa laog kan mga harong en kaso man na maeksperyensyahan na ashfall gikan sa nasambitang bulkan.
