LEGAZPI CITY – Nagbale man an mga nagkapirang grupo sa mga nangyaring hiro protesta nganing kondenahon an mga nangyayaring katiwalian sa mga flood control projects kan gobierno asin naghahagad nin paninimbagan sa mga tiwaling pulitiko.
Segun ki August Twenty-One Movement President Volt Bohol sa intrevista kan Bombo Radyo Legazpi na katakod kaini an ipiglansar ninda liwat an Anti-Cronyism Movement (ACRONYM) na enot na ipiglansar kan panahon kan Martial Law kan saindang co-founder asin Chairman na si Reli German
An inisyatiba nagmamawot na itampok asin hampangon an padagos na isyu nin korapsyon sa gobyerno, na partikularmenteng pigtutukan an mga public officials asin an saindang mga kairiba na salang piggagamit an public funds.
Poon pa suboot kan EDSA People Power Revolution an warang siisay man na napapanimbag na pulitiko asin ngonian na dapat maipahiling an paninindugan huli ta kun warang mapapanimbag an magpapadagos an siring kaining gawi kan mga pulitiko.
Pigtaram pa kan presidente kan grupo na nauulit an kaparehong sistema huli ta maski nakulong an korap na pulitiko an nakakagibo pa man ini nin paagi asin nakakalaya.
Dakula man an magigin ambag kan partisipasyon kan namamanwaan sa mga demokratikong proseso asin dapat maisagibo an mga hiro protesta sa matuninong na paagi.
Nagpe-preparar na man sinda sa gigibuhon nindang aktibidad sa maabot na anibersaryo kan deklarasyon kan Martial Law alagad dae na muna siya nagtao pa nin kadugangang detalyes asin abangan na sana suboot sa saindang anunsyo.
Pagdoon pa ni Bohol na dapat magtenir na rigmat an publiko huli ta bako sana dawit sa mga anomalya sa flood control projects an mga contractor kundi may kinaaraman man digdi an nasa taas pa ninda na mga makapangyarihang tawo na pigsusunod ninda.
