LEGAZPI CITY-Nagdugang nin pwersa an mga kapulisan sa Albay ngani bantayan an seguridad sa boarder control point harani sa Bulkang Mayon kasunod kan nangyaring matinding ashfall hale sa Bulkang Mayon.
Segun kay Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi na nagkaigwa nin zero visibility sa area kan Quirangay sa Camalig, asin nasa 39 barangay an apektado sa Guinobatan.
Nagtao man sinda nin asistensya sa mga apektadong residente partikular na sa mga senior citizens asin sa mga indibidwal na igwang asthma.
Sinabi pa kan opisyal na enot na naapektaran kan PDCs na may kairibang rockfall asin ashfall an banwaan kan Camalig asin Guinobatan sa Albay.
Nagtabang man sinda ngani ma-divert an kakalsadahan asin maibitaran an trapiko sa lugar.
Wara man nin nairehistrong aksidente asin nagin “generally peaceful” man an sitwayson huli sa marikas na pagresponde asin koordinasyon kan BFP asin MDRRMO.
Katuwang man ninda sa pagresponde an iba pang mga law enforcement agency na nagtarabang para sa kaligtasan asin seguridad kan mga namamanwaan.
Sa presente, bantay sarado an boarder control point asin pigaabisuhan an gabos na mahigot na pinagbabawal an paglaog sa 6km permanent danger zone.
