LEGAZPI CITY – Posibleng mahampang sa reklamo an mga aspirante sa provincia kan Albay na dae nakapagrehistro kan saindang campaign online platforms.
Magigirumduman kaya na kasuhapon an deadline kan Commision on Elections para sa mga gabos na aspirante kan 2025 Midterms Elections na iparehistro an saindang mga gagamiton na social media accounts sa pangangampanya.
Segun kay Atty. Ma. Aurea Bo-Bonao an Election supervisor kan COMELEC Albay sa intrevista kan Bombo Radyo Legazpi na required an gabos na mga aspirante asin mga partylist na iparehistro an saindang account na gagamiton sa pangangampanya sa masunod na taon.
I-isyuhan suboot nin show cause order dangan papaeksplikaron kun nyata dae nagparehistro an sarong aspirante o partylist kan saindang mga online campaign accounts.
Sa presente, gabos man na mga aspirante sa provincia kan albay an nakacomply asin nakapagparehistro kan saindang account antes matapos an nakatalang deadline kasuhapon.
Mientrastanto, pigpaplanohan man kan komisyon na magsagibo nin road show kan mga bagong makina sa enterong provincia nganing maaraman kan publiko kun ano an igwa asin proseso manungod sa mga ini.
Isasairarom man an mga paratukdo sa training para sa paggamit kan mga voting machines sa papaabot na marso nin huli ta dapat aram ninda an pasikot sikot kan mga automated counting machines.
Pigtaram man kaini na pag-abot kan primerong bulan kan taong 2025, mapaotob na man nin mga ordinansa manungod sa eleksyon asin pangangampanya nin huli ta malaog na an mga provisions dangan guidelines kan komisyon kun kaya laoman suboot na magigin mahigot an mga primerong bulan kan taon.
Pangapodan ni Bo-Bonao sa lambang albayano na makisumaro sa pigsasagibong roadshow asin mock elections nganing mahiling asin maeksperyensya ninda an paggamit kan mga bagong makina.
