LEGAZPI CITY — Katakod kan anunsyo ni Legazpi City Mayor Noel Rosal na pagkumpleto kan trabaho para sa ipinasaradong dump site sa syudad, inanunsyar man kan alkalde an saiyang planong pagkonstruhir nin panibagong istruktura sa nasambitan na lugar.
Sigon ki Mayor Rosal, plano kan saiyang administrasyon na patugdukan an dating dump site nin sarong housing project o golf course, recreation center asin iba pang imprastraktura na igwa nin kinaaraman sa turismo.
Sinabi pa kaini na mawot nyang masierto na magagamit an daga bilang parte kan pag-uswag kan pinamamayuhanna syudad ngani na magtao nin benepisyo sa mga tawo, espesyalmente sa mga residenteng nasa itaas na barangay o highlanders.
Apwera digdi, inilatag man kan alkalde sa mga partisipantes kan University of the Philippines National Engineering Center (UP-NEC) training na obheto kan mahigot na pag-utob sa RA 9003 o an Ecological Solid Waste Management Act na mabawasan an air pollution na nagkakawsa nin mga seryosong helang asin nakakadistroso sa kapalibutan.
Ipagpapadagos man suboot kan saiyang administrasyon an pag-implementar kan tamang pagmanehar nin basura ngani na mamantinir an imahe kan Legazpi bilang saro sa best implementors kan nasambitan na ley sa rehiyong Bicol.
