Sienerto kan Malacañang na nagpapadagos an paghahanap kan gobierno ki dating kongresista Zaldy Co sa ibong kan pag-archive kan Sandiganbayan sa graft case laban saiya huli sa pagpalyar na maarestar siya sa laog kan labi sa anom na bulan.
Sinabi ni Palace Press Officer Undersecretary Claire Castro na dae pigpabayaan kan mga otoridad an saindang mandato na hanapon si Co, na nahahampang sa mga kasong graft asin malversation katakod kan suboot maanomalyang road dike project sa Naujan, Oriental Mindoro.
Tinawan-doon man ni Castro na an pag-archive kan kaso an sarong procedural na lakdang sana asin dae boot-sabihon na ibinasura na ang mga kasong isinunad laban ki Co.
Paramientras na hinali sana an kaso sa listahan kan mga aktibong pigdadangog kan korte asin tulos ining ibabalik sa regular na proseso pag naarestar na an dating lehislador.
Pagpapaliwang pa ni Castro na nagpupundo man an pagdalagan kan prescriptive period mantang naka-archive ang kaso, kaya dae mawawara an paninimbagan ni Co maski maghaloy pa an saiyang pagtitinir sa luwas kan nacion.
Magigiromdomang dating chairman kan House Committee on Appropriations si Co asin saro sa mga pangenot na personaldad na ipigdadawit sa suboot anomalya sa mga flood control project.
Kan Nobyembre 2025, nagluwas siya nin mga video sa social media na nagdadawit ki Presidente Ferdinand Marcos Jr. asin dating House Speaker Martin Romualdez sa suboot kickback scheme.
Naghali si Co sa Pilipinas kan Hulyo 2025 gamit ang travel authority para sa medical treatment.
Nagpaluwas an Sandiganbayan nin warrant of arrest laban saiya kan Nobyembre 21, 2025.
Kan Abril, sinabi ni Marcos na sisikapon kan gobierno na maibalik si Co sa nacion makalihis mai-report na naarestar sa Czech Republic huli sa suboot pagbalgar sa immigration laws. Kalaunan, kinumpirma kan Malacañang na wara na siya sa kustodiya kan Czech authorities asin nagsunad nin aplikasyon para sa political asylum sa France.
