Wara suboot nin pipirmahang kasunduan kaugnay kan US-led Pax Silica Initiative sa pagbisita ni United States President Donald Trump sa Pilipinas.
Kinumpirmar ini ni Pangulong Ferdinand Marcos Jr. antes an bilateral meeting ninda ni Trump sa Malacañang, makalihis hapoton kan mga mamamahayag kun igwang nakatalaang pagpirma sa sarong framework agreement para sa nasabing inisyatiba.
Sinaysay ni Marcos na dai ini sakop kan pagbisita, asin enot man nang sinabi ni US Ambassador to the Philippines Lee Lipton na wara nin pipirmahang kasunduan.
Sinang-ayunan ini ni Marcos asin piglinaw na dai kabali sa mga pag-oolayan sa saindang pagtiripon an Pax Silica.
Dai man ini nangangahulugan na tuluyan nang ipinondo an propuestong kasunduan, huli ta marurumdoman na sinabi ni Philippine Ambassador to the United States Jose Manuel Romualdez na kaipuhan pang ayuson kan duwang nasyon an mga detalye kaini antes ini maisapinal.
Enot man nang sinabi ni Department of Trade and Industry Undersecretary Ceferino Rodolfo na target pa man giraray na mapirmahan an legal framework kan Pax Silica antes matapos an 2026, na katuyuhang pakusugon an supply chain para sa mga importanteng teknolohiya arog kan semiconductors asin artificial intelligence.











