LEGAZPI CITY-Tuminama an sarong makusog na linog na igwang magnitude 7.7 sa baybayon kan West Indonesia, kan maagahon kan Sabado, susog sa geophysics agency.
Nakapag-rehistro man nin saradit na ukol kan tsunami na mas hababa sa sarong metro o (3 talampakan) sa nagkapirang lugar makalihis an pagyugo.
Nai-rekord an enot na pagyugo bandang 4:58 nin maagahon na igwang rarom na 15 kilometro, na sinundan kan nagkapirang aftershocks.
Segun kay Dodi Yuleova, tagapagtaram kan national disaster mitigation agency, marikas na nagdulag paluwas kan saindang mga harong an kadakol na residente kan mamatean an makusog na pagyugo na naghaloy nin humigit-kumulang sarong minuto sa rehiyon kan Nagekeo asin Bima.
Sa tahaw kan matinding takot, wara man tulos nin nairehistrong malalang danyos sa mga imprastraktura.
Mientras tanto, sarong beripikadong video hale sa ciudad kan Maumere sa Flores Island an nagpahiling nin pagbagsak kan nagkapirang parte kan edificio sa tahaw kan pagluwas kan mga namamanwaan sa kakalsadahan.
Nairehistro man an pag-ebakwar kan mga pasyente palwuas sa sarong ospital sa distrito kan Ende sa East Nusa Tenggara Province ngani masierto an saindang kaligtasan.
Ipighayag man kan tsunami warning centre kan Australia na warang banta nin tsunami sa arin man na parte kan saindang mainland, mga isla, o teritoryo huli sa nasabing linog sa irarom kan kadagatan sa West Indonesia.
