Pinarangalan ni US Defense Secretary Pete Hegseth an suldado na nanita saiya asin sa saindang mga pag-iriba huli sa pagribog harani sa sagradong Tomb of the Unknown Soldier sa Arlington National Cemetery kan pagrumdom kan Veterans Day.
Itinao ni Hegseth an Joint Service Commendation Medal ki Specialist Iglesias kan 3rd Infantry Regiment kan U.S. Army, na bisto bilang The Old Guard, sa seremonya sa Pentagon kan Huwebes.
“We love soldiers. We love standards. Well done, Specialist,” wika ni Hegseth.
Nag-ugat an insidente kan Miyerkules makalihis madangog na nag-uulok asin nag-oolay an grupo ni Hegseth kasunod kan pagkuwa nin ladawan sa lugar, kaya nagpundo sa pagpapatrolya si Iglesias asin pinagirumduman sinda na imantenir an katrangkiluhan asin pagrespeto sa gabos na oras.
Nakaresibe nin batikos an online asin hali sa mga lehislador an video kan paninita, alagad inomaw ni Hegseth an suldado huli sa pagiging honesto asin propesyunal kaini sa pagpapaotob nin mahigot na polisiya sa bantayog.
An Tomb of the Unknown Soldier an pigbabantayan nin 24 oras kan The Old Guard puon pa kan 1948 bolang pagpupugay sa mga dae nabisto na suldadong Amerika na nagadan sa giyera, kun sain mandato kan mga sentinel na sawayon an siisay man na nagbabayolar sa pagigin silensyo kan lugar.
