Binawian nin buhay an 14 katawo asin dakol na iba pa an irido makalihis an karambola nin nagkapirang behikulo sa Fujairah, United Arab Emirates.
Segun sa interior ministry kan UAE, nawaran nin kontrol an sarong truck asin tuminama sa nagkapirang behikulo.
Maabot sa 23 na mga behikulo kaibanan an limang trucks an naimbwelto sa nasabing aksidente.
Huli na man sa matinding banggaan, nasulo pa an truck.
Dinara man sa ospital an nasa 38 katawo mantang pigsasairarom sa DNA test an mga biktima ngani na maaraman an pagkakabisto kan mga ini.
Kadaklan sa mga nagadan an mga Emirati nationals mantang an nagkapira an mga Indian.
Padagos man an ipigsasagibong imbestigasyon kan mga otoridad dapit sa nasabing insidente.
