LEGAZPI CITY – Dae pa man nagpupuon an bulan fire prevention month Bureau of Fire Protection (BFP), kadakol na an nairehistrong kasulo sa syudad kan Legazpi pag-abot kan presenteng taon.
Sa likod kaini an manlaen-laen man na rason o kawsa kan kasulo kun saen segun ki Fire Chief Supt. Igmedio Bondoc Jr, an BFP Bicol regional director, nangengenotan sa listahan na pinunan kan insidente an linya kan kuryente.
Sarong ehemplo na digdi an nangyaring kasulo sa Barangay 28 Victory Village ngunyan na Pebrero kun saen an lumang poste kan kuryente an pigsasabing pinunan kan kasulo.
Sunod sa listahan an dae namangnuhan o nabayaang pigluluto, open flame asin an carelessness o kapabayaan kan ibang indibidwal siring na sana an basang na pagtapok kan upos nin sigarilyo.
An mga fire prone areas pa suboot an mga harong na gibo sa combustible o light materials urog na an mga lumang harong.
Kun kaya segun ki Bondoc, sa tabang kan barangay electrician, kaipuhan na mai-check an wiring kan lambang harong sa lugar.
Nag-abiso man an opisyal na kun enkaso mangyari an kasulo sa partikular na lugar, kaipuhan sana kan residente na magkurahaw nin tabang ngane na makapagtao nin alarma sa iba pang residentes dapit sa nangyayari.
Sa paagi kaini, makakahagad tulos nin tabang hale sa ahensya.
Dae man suboot magbalo na ika mismo an mapundo kan kasulo asin siring man, maging kalmado sana huli sa ini an mas makakatabang na magibo an tamang lakdang.
Nagtutubod man an opisyal na sa paagi kan padagos na pagtukdo o pag-edukar sa mga kahimanwa, maiibitaran an disgrasya.
