LEGAZPI CITY – Ipiglatag na kan Bureau of Fire Protection Legazpi an saindang mga aktibidad asin programa katakod kan pagpopoon kan fire prevention month.
Segun ki Legazpi City Fire Station Public Information Officer Senior Fire Officer 2 Norman Andes sa intrevista kan Bombo Radyo Legazpi na kabale digdi an pagsasagibo nin regional kick off asin serye kan mga aktibidad sagkod sa pagtatapos kan bulan nin Marso.
Alagad punto niya na an paglikay sa kasulo an dae dapat pigsasagibo sana tuyong fire prevention month kundi dapat piggigibo ini urualdaw mantang regular na pigsasagibo ini pagsapit nin Marso huli ta ini an bulan kun sain nagdadakol an mga nairerehistrong kasulo.
Kadaklan man suboot sa mga nairerehistro nindang kasulo sa kasagsagan kan fire prevention month iyo an bushfire, pagkasulo sa mga basurahan, asin an mainit na panahon na pwedesir magtrigger nin kasulo sa mga electrical appliances.
Pangapodan man kan opisyal sa publiko na tulos i-report sa pinakaharaning fire station enkaso makahiling nin sarong kasulo nganing tulos ining ma-aksyunan o kaya tulos ining tumpuson nganing dae na magdakula an kalayo.
Basado man sa saindang eksperyensya, nagkakaigwa na sa presente nin kaaraman an namamanwaan mapadapit sa paglikay asin pag-apula kan mga insidente nin kasulo.
Pagdoon man ni Andes na kaipuhan an labing pag-iingat sa pang-urualdaw na pamumuhay nganing makalikay sa kasulo mantang pig-enganyar an publiko na makisumaro sa saindang aktibidad ngonian na fire prevention month.
