LEGAZPI CITY—Padagos na nakaantabay an Land Transportation Franchising and Regulatory Board Bicol sa mga biyahe kan mga behikulo ngonian na papaabuton na Semana Santa.
Segun ki Land Transportation Franchising and Regulatory Board Bicol Regional Director Joel Defeo, sa intrevista kan Bombo Radyo Legazpi, na igwa sindang mga personahes na naka-deploy sa mga terminal kun saen nag-iinspeksyon sinda nin mga units magin mga terminal nganing masimbagan an mga posibleng pangangaipuhan kan namamanwaan.
Igwa sindang pig-deploy na pigduwang mga personahes sa mga pangenot na terminal sa Bicol siring sa Naga, Legazpi, asin Sorsogon.
Mantang may saro man na naka-deploy na personahes sa Masbate asin Camarines Norte.
Mientrastanto, nakiolay man ini sa mga pasahero na mabiyahe pasiring sa Bicol na magbalon nin pasensya huli ta pwedesir na magin halaba an oras kan saindang biyahe na kawsa na man kan road reblocking asin trapiko.
