LEGAZPI CITY- Nagpaparahay na sa ospital asin salbado na sa kagadanan an sarong lalaki makalihis na pagbabadilon kan limang armadong lalaki sa Barangay Coliat sa Oas, Albay.
Sigon ki PC/Insp. Arthur Gomez, tagapagtaram kan Albay PNP, napag-araman na limang lalaki an nagpasiring sa nasambitan na barangay asin naghahapot dapit sa sarong partikular na tawo.
Sakto man suboot na nagluwas nin harong si Joey Boy Rempillo, 21-anyos alagad kan mahiling ini kan mga armadong lalaki, nagbulnot an mga ini nin badil asin pinaputukan an biktima.
Dae napandokan an mga suspek na marikas na nagdulag asin sa ngunyan, pighahanap pa kan mga otoridad mantang idinalagan sa ospital si Rempillo.
Duwa an pighihiling na anggulo sa nasambitan na insidente kabale na an dudang miyembro kan notorious na Concepcion gang an nambadil sa biktima urog pa na boundary na kan banwaan kan Libon an barangay na pinangyarihan kan krimen na pigtutubudan na kuta man kan gang.
Pighihiling man na anggulo na igwa nin kinaaraman an New People’s Army (NPA) sa krimen alagad padagos pang pig-iimbestigaran kan mga otoridad an mga nagunong impormasyon.
