Posible suboot na dagos nang maging ganap na ley an propuestong magtatalaan nin national minimum wage system sa nacion ngunyan na 20th Congress.
Sa intrevista kan Bombo Radyo Philippines ki Ka-Mangagawa Partylist Rep. Eli San Fernando, nasa committee level na an saiyang propuestong ley asin posibleng sa enot na quarter kan presenteng taon maisalang na ini sa plenaryo.
Pagbuyagyag kaini na dakol na mga lehislador an nagpahiling kan saindang suporta.
Napapanahon na suboot na magkaigwa nin national minimum wage system na magbubuwag sa provincial rate huli ta pare-pareho man na apektado kan paglangkaw kan presyo kan babarakalon asin bayad sa serbisyo an gabos na mga provincia.
Nilinaw man kan kongresista na igwang tulong taon na transition period enkasong dagos na ining magin ganap na ley.
Paliwanag ni San Fernando na warang dapat ikahadit an mga negosyante huli ta padiit diit man ining ipapaotob ngani na dae mabigla an Philippine market asin ngani na dae magkaigwa nin mahewasan na negatibong epekto sa manlain lain na sektor.
