LEGAZPI CITY – Padagos na nakabantay an mga personahes kan Tabaco City Police Station sa pagmamantenir nin pazy orden katakod man kan mga nairerehistrong aktibidades kan Bulkang Mayon na presenteng nasa alert level 3.
Sa intrevista kan Bombo Radyo Legazpi kay Chief of Police Police Lieutenant Colonel Virgil Bibat, sinabi kaini na nagtetenir an 24/7 saindang deployment nin kapulisan sa evacuation center siring man sa mga ipigdesignar na border control points.
Pasalamat niya man na dae sinda labing naapektaran kan magkakasunod na ashfall na nairehistro kan bulkan mantang nakahanda na man sinda dapit digdi enkaso magtapos na an amihan o pagbabago kan direksyon kan paros.
Dae niya man pighahale an posibilidad na may ma-porbar na maglaog liwat sa 6KM permanent danger zone partikularmente na an pirang evacuees asin paraooma nganing hilingon an saindang mga harong asin saindang mga omahan.
Pigtaram pa kan opisyal na poon kan mag-alburuto an bulkan kan nakaaging bulan, nagin sestimatiko na an saindang pagbabantay sa mga evacuation centers asin nakakapagtao na nin kadugangang aktibidades para sa mga kaakian asin kababaihan nganing malibang an mga ini.
Punto pa niya na sa ibong kan wara man nin patod an pigtataong tabang kan Gobyerno, iba man liwat suboot an pangmate na nagtetenir an mga Internally Displaced Person sa mga evacuation centers kaysa sa saindang harong kun kaya naghihingoa man sinda na mabago ini.
Regular man an saindang paglilibot sa laog kan 6KM permanent danger zone nganing maibitaran an mga insidente nin panghahabon sa mga kaharongan kan mga nag-ebakwar urog nang saro ini sa mga isipon kan mga evacuees.
Pagsyerto man ni Bibat sa saindang mga residenteng nasa evacuation center na katabang ninda an kapulisan sa pagmamantenir kan katuninongan sa tahaw kan padagos na aktibidad kan Bulkang Mayon.
