Masairarom sa masusing pag-aadal kan Malacañang an pangapudan kan transport groups para sa pisong dugang na pamasahe, sa mawot naman ni Presidente Ferdinand Marcos Jr. na maibsan an gastuson kan mga commuter sa saindang pamasahe.
Sinabi ni Palace Press Officer Atty. Claire Castro na kaipuhang balansehon an kapakanan kan mga pasahero, mga tsuper asin operator kan mga pampublikong lunadan na nadidificilan huli sa padagos na paghalangkaw kan presyo nin gasolina asin krudo.
Sinabi ni Castro na bako sana an Department of Transportation (DOTr) an maadal asin madesisyon kun kakayanon na maitao an kahagadan kan transport groups, kundi an bilog na economic team ni Presidente Ferdinand Marcos Jr.
Dugang kan opisyal na magkakaigwa nin mga konsultasyon asin public hearings nganing madangog an lado kan gabos nin stakeholders bago maitao nin desisyon an gobyerno.
Dae man masabi ni Castro kun ano an pwedesir i-bargain kan gobierno sa mga drayber asin operator nganing mapugulan an paghalangkaw kan pamasahe, urog na dae maubra an pagbabarewas nin fuel subsidy sa nasabing sektor.
Ipapaubaya suboot ki DOTr Secretary Vince Dizon kun ano an pwedesir maitabang sa transport groups nganing mapagaan an pasanon sa halangkaw na presyo kan produktong petrolyo.
