LEGAZPI CITY-Nagsangat nin petisyon sa Land Transportation Franchising and Regulatory Board (LTFRB) an transport group na Pinagkaisang Samahan ng mga Tsuper at Operator Nationwide (PISTON) para sa P10 na dagdag sa minimum na pamasahe sa pampasaherong jeep.
Kun maaprobaran, posibleng maglangkaw na sa P23 an minimum fare sa pampasaherong jeepney.
Segun kay PISTON President Mody Floranda, kulang pa an temporamenteng tabang kan gobierno arog kan fuel subsidy huli ta sarong beses sana ini ipigtatao.
Dagdag pa niya na padagos na namamatean kan mga driver asin operator an epekto kan halangkaw na presyo kan krudo asin iba pang barakalon.
Tinawan doon kan grupo na dae nakatabang an padagos na pagsuspinde kan excise tax sa LPG asin kerosene huli ta padagos man liwat an paglangkaw kan iba pang gastos arog kan maintenance sa mga behikulo.
Sinabi pa kan grupo na an presenteng P1 fare increase na itinatao kan LTFRB, kulang para sa uru-aldaw na pangangaipo kan mga tsuper.
Idinagdag pa ninda na maski pa igwa nin diit na rollback sa presyo kan langis, dae man liwat ini nababawi sa mga naenot nang darakulang paglangkaw kan presyo.
Sa parte man kan LTFRB, sinabi kaini na tulos nindang pag-aadalan an naisangat na petisyon.
