LEGAZPI CITY-Nagpuon na an transport strike na pig-organisar kan grupong MANIBELA sa Quezon City ngonian na aldaw Lunes, Setyembre 28 bilang parte kan saindang tulong aldaw na hiro protesta.
Nagkaigwa man nin caravan an grupo pasiring sa PHILCOA, na sinabayan kan mga drayber kan TNVS, mga motorcycle, taxi rider, asin mga drayber kan UV Express.
Kabali sa mga kahagadan kan grupo, iyo an mas hababang presyo kan gasolina, paglangkaw kan pamasahe, asin an paghale kan excise tax asin value-added tax (VAT) sa mga produktong petrolyo.
An nagkapirang mga drayber nin motorsiklo, taxi, asin TNVS, nagdesisyon man na isuspinde an operasyon para sa aldaw nganing ipaheling an pakikisumaro sa welga sa transportasyon.
Segun ki Manibela chairperson Mar Valbuena, piglaoman na maabot sa 20,000 sagkod 25,000 na jeepney drivers sa manlaen-laen na ruta sa Metro Manila an mapartisipar sa welga.
Tinatsaran man kan grupo an Land Transportation Franchising and Regulatory Board (LTFRB) sa pahayag kaini na posibleng mag-atubang nin multa an mga drayber na mapartisipar sa welga.
Mientrastanto, nagkapirang local government units (LGUs) sa Metro Manila an nag-opresir nin libreng sakay ngani makatabang sa mga commuters na apektado kan welga ngonian na Lunes.
An transport group na PISTON, dati nang nag-anunsyo nin plano na magkaigwa nin duwang aldaw na welga poon naman saaga, Setyembre 29 hasta 30, bilang protesta man sa padagos na paglangkaw kan presyo kan gasolina.
