LEGAZPI CITY-Uminabot sa haros 16 katawo an nagadan mantang 54 naman an nairido makalihis magtama an Magnitude 7 na linog sa Tibet, China.
Segun sa mga opisyal, labi sa 300 na kaharongan asin 20 kulungan kan mga ataman na hayop an nagguho huli sa makusog na pagyugo.
Basado sa datos kan United States Geological Survey (USGS), tuminama an linog pasado alas 10:33 nin banggi.
Natukoy an epicenter kaini sa rayong 119 kilometro sa silangan-hilagang-silangan kan Nagqu, sarong halangkaw na lugar sa Northern Tibet.
Nairehistro an rarom kaini na 18 kilometro o 11 miles.
Mientras tanto, labi sa 1,600 katawo gikan sa lokal na lalawigan an itinalaga ngani magtabang sa mga rescue operations.
Nakapagrehistro man an mga otoridad nin haros pitong aftershock na may kusog na Magnitude 4.3 hasta 5.2 asin rarom na nasa 10 kilometro.
Susog sa mga report sa China, dae pa nakokontal an nagkapirang parte kan rehiyon huli sa pagkaantala o pagkawara kan komunikasyon.
Nagresulta man ini nin mga rockfall, na nakaapektar sa nagkapirang national road.
Solamenteng mga emergency vehicles sana para sa mga rescue operations an pigtutugutang makaagi pasiring sa mga apektadong lugar.
Mientras tanto, ini na an pinakamakusog na linog na nairekord sa rehiyon sa nakalihis na limang taon.
