LEGAZPI CITY- Ipighayag ni Guinobatan Mayor Gemma Ongjoco na naging matoninong an ika-limang aldaw kan pagpapaotob nin granular lockdown sa 41 barangay kan banwaan katakod kan naglalangkaw na kaso nin COVID 19.
Sa intrevista kan Bombo Radyo Legazpi kay Mayor Ongjoco, inomaw kaini an mahigot na pakikisumaro kan mga residentes asin pagsunod sa mga pigpapaotob na health protocols.
Sa irarom kan granular lockdown bawal na magluwas an mga residentes sa saindang harong apwera na sana kung may emerhensya o essential activity na gigibohon, mantang kaipohan man nin quarantine pass.
Solamenteng an mga barangay sana kan Batbat, Balolo asin Pood an dae nakasabay sa nasabing lockdown huli sa wara o diit sana an naireport na kaso nin COVID 19.
Segun kay Ongjoco, nagpuon an lockdown kan Oktubre 13 asin matapos sa petsa 21 alagad nakadepende na sana sa mairerehistrong kaso nin COVID 19 kung papalawigon pa ini nin saro pang semana.
Pangapudan kan opisyal sa mga residentes na makisumaro sa programa asin sunudon an mga pigpapaotob na regulasyon nganing mas marikas na magbaba an kaso kan nakakaolakit na helang asin mas marikas man na matapos an lockdown.
