LEGAZPI CITY – Liwat na natapos na an mga pigsasagibong clearing asin flushing operation kan Bureau of Fire Protection sa provincia kan Sorsogon makalihis an pag-alburuto kan Bulkang Bulusan.
Segun ki Bureau of Fire Protection Sorsogon Public Information Service Chief Fire Officer III Kristine Ducay sa intrevista kan Bombo Radyo Legazpi na nalinig na an gabos na mga major targets sa provincia na naapektaran kan pagputok kan nasabing bulkan.
Dae man ninda pighahale an pagsasagibo nin monitoring sa mga lugar na kaipuhan pa nin dugang na flushing operation.
Nakikipagtabangan man an mga barangay officials nganing maaraman ninda kun arin pa an kaipuhan dumanon kan saindang ofisina.
Pighayag pa kan opisyal na maabot sa poco mas o menos na sampulong firetrucks an nagronda sa saindang provincia nganing magin katuwang sa paglinig sa mga apektadong mga banwaan.
Nagpasalamat man ini sa saindang mga tropa na maski abuton nin maagahon an warang patod an saindang paglinig sa mga naapektaran kan ashfall na hale sa pagputok kan bulkan.
Pagirumdom kaini na permihang magsulog nin facemask asin magsunod sa mga otoridad enkasong magpaotob nin evacuation.
