LEGAZPI CITY—Naarestar an duwang persona na pigkonsiderar na street-level individual sa kinundusir na buy-bust operation kan Legazpi City Police Station sa Purok-2, Brgy. 33-Peñaranda, Legazpi City, Albay.
Segun ki Legazpi CPS PIO PEMS Carlos Paña, sa intrevista kan Bombo Radyo Legazpi, an saro sa mga suspetsado, 30-anyos, asin warang agom; mantang an saro pang suspetsado, 21-anyos, warang agom asin sarong tricycle driver.
Nakumpiskar sa saro sa mga suspetsado an pinagtutubudang shabu na may gabat na 0.5 gramo asin may kantidad na P3,500.
Mantang 0.2 gramos nin pigtutubudang shabu an nakumpiskar sa saro pang suspetsado.
Sa presente, nasunadan na nin kaso an duwang persona sa pagbalgar sa Republic Act 9165 o Comprehensive Dangerous Drugs Act of 2002.
