LEGAZPI CITY – Napag-araman na nasa impluwensya nin arak an driver kan motorsiklo na suminalpok sa kahalabaan kan Ziga Ave, P3, Barangay San Lorenzo, Tabaco City, Albay.
Segun sa kapitan kan nasabing barangay na si Tophe Brutas sa intrevista kan Bombo Radyo Legazpi na kinumfirmar sainda ini kan mga kapulisan na nagsagibo nin imbestigasyon sa nasabing insidente.
Basado man sa saindang naguno na impormasyon na hale suboot sa pagkararigus an sakay kan motorsiko asin kan pag-iriba kaini na pararehong nakamotor man sa Malilipot, Albay.
Mantang nasa byahe suboot ini pauli kasunudan an saindang pag-iriba an nagkarera an mga ini asin kan pag-abot sa pinangyarihan kan insidente an pwedesir na na-out of balance ini rason kun kaya sinalpok kaini an kasabatan na kotse.
Pigtaram pa kan kapitan na wasak man an inotan na parte kan kotse asin sa kagayunan an dae man nagsapar nin ano mang lugad an driver kaini mantang nagsapo man nin mga lugad manlain-laing parte kan lawas an driver kan motorsiklo asin kan angkas kaini.
Depende na suboot sa kaluluwasan kan isinagibong imbestigasyon kan otoridad kun ano an masunod na lakdang sa nangyaring salpukan.
Sa ibong suboot kan pagigin kompleto kan saindang mga inisyatiba arug kan pagbubugtak nin CCTV, pedestrian lane, asin signages an may mangyayari man giraray na insidente kun bako responsable an mga driver na nagmamaneho sa tinampo.
Paglilinaw ni Brutas sa mga nagtutuyaw kan saindang ipinaluwas na footage kan insidente an mawot man sana ninda na magkaigwa nin kaaraman an mga driver nganing dae na mautro pa asin bako an ipasupog an mga imbwelto sa nangyaring banggaan.
