Pig-iimbestigaran na kan Department of Public Works and Highways asin kan Ombudsman an posibleng koneksyon kan mga kontratistang sinda Curlee asin Sarah Discaya sa CLTG Builders na pagsasadiri kan ama ni Senador Bong Go.
Sinabi ni DPWH Secretary Vince Dizon na ini an pinag-olayan ninda ni Ombudsman Jesus Crispin Remulla.
Enot kaini, pigbuyagyag ni Remulla na nagsayuma an mag-agom na Discaya na ihayag an detalye kan saindang partnership sa CLTG.
Magigirumduman na nanindugan si Go na wara siyang pakiaram sa operasyon kan mga negosyo kan saiyang pamilya.
Sinabi ni Dizon na nagka-olay sinda ni Remulla makalihis na mabuyagyag na dae na makikipagtabangan an mga Discaya sa Independent Commission for Infrastructure (ICI) na nagkokondusir nin imbestigasyon sa mga anomaliya sa proyekto kan gobyerno.
Dugang pa ni Dizon, mawawaran nin tsansa an mag-agom na Discaya na maging state witness kun padagos an pagsayuma na makikooperar sa mga imbestigasyon sa flood control projects.
