LEGAZPI CITY-Pig-eenganyar kan Department of Science and Technology Bicol an gabos na magin handa asin pwedisir man na i-adopt an pagkakaigwa nin “emergency go bag” para sa posibleng mga sakuna.
Segun kay DOST Bicol Director Rommel Serrano, sa intrevista kan Bombo Radyo Legazpi na parte ini kan pagigin handa kan saindang ahensya asin iba pang pampubliko asin pribadong ofisina bilang inisyatibo asin pagpapahiling nin kahandaan sa oras nin posibleng mga sakuna.
An “emergency go bag” an igwang laog na mga kakaipuhan enkaso ma-stock sa sarong lugar siring kan emergency kit, whistle, mga de lata, emergency light asin iba pa.
Makakatabang suboot ini ngani maka-survive nin pirang oras o aldaw hasta sa mag-abot an mga nagreresponde asin para sa pag-extend kan saindang mga kapasidad enkaso igwang mga kalamidad.
Posible man suboot na mag-design nin mga “go bag” kun sain may kulay ining madaling mahiling siring kan kulay orange o yellow.
Pangapudan man kan opisyal sa gabos na magin handa asin aramon an mga gigibuhon sa oras nin sakuna asin emerhensya.
