LEGAZPI CITY- (Update) Nanindugan an Department of Interior and Local Government (DILG) na dae man pwesesir na gamiton sa mga personal na bagay an anuman na asset o gamit na pagsadiri kan mga opisina kan gobyerno.
Ini an katakod kan nangyaring aksidente sa San Fernando, Camarines Sur na nagcausa nin pagkagadan kan 13 katawo asin pagkairido nin dakol na iba pa na pigsasabing imbwelto an truck na pagsadiri kan lokal na gobierno.
Sa intrevista kan Bombo Radyo Legazpi ki DILG Bicol Director Atty. Anthony Nuyda, may paninimbagan an mga opisyal kan San Fernando LGU na nagtao nin otorisasyon sa paggamit kan nasabing truck na hali sa sayudan.
Segun ki Nuyda, contrario sa ley an paggamit kan mga government property sa bako man pampublikong bagay afuera na sana sa mga peryodo nin kalamidad o emerhensya.
Magigirumduman na nawaran nin preno an nasabing truck sa pababang parte kan Brgy. Tagpocol, San Fernando na nagresulta sa pagkakagadan kan nagkapirang pasahero kaibanan na an babayi na nakatalaan na kutang ipakasal.
