Wara pang impormasyon kun may Pilipinong naapektaran sa pambobomba kan Estados Unidos sa tulong nuclear sites sa Iran, susog sa Department of Foreign Affairs (DFA).
Sinabi ni DFA Assistant Secretary Robert Ferrer na bako malinaw kun may mga Pilipino sa mga tinamaan nin airstrikes an nadamay alagad pigpapagiromdoman an mga Pilipino na umiwas sa mga pasilidad kan Iran.
Segun ki Ferrer, may labing 1,200 Pilipino sa Iran, asin siyam na an naghahagad na makauli sa Pilipinas.
Sienerto man ni Ferrer na an mga personahes kan Philippine Embassy sa Tehran an huring maluwas kan nacion, nganing masierto na naasikaso muna an mga mawot na mag-uli.
Mientrastanto, 223 Pilipino sa Israel an naghagad nin repatriation, kun saen 26 sainda an naka-iskedyul nang makahali. Pigkarkulong nasa 30,000 Pilipino an nasa Israel.
Sarong Pilipino man an nasa kritikal na kondisyon, mantang pito na an nakaluwas na nin ospital.
Maabot sa 88 na mga kaharongan kan mga Pilipino an naireport na naraot huli sa airstrikes kan Iran, asin 80 katawo digdi an nailipat sa mas ligtas na lugar.
Kan Biyernes, itinaas na kan gobierno kan Pilipinas sa Crisis Alert Level 3 an Iran asin Israel, na nangangahulugang pig-aabisuhan an mga Pilipino sa nasabing mga nacion na boluntaryong mag-uli na huli kan nagtitinding tensyon sa rehiyon.
