LEGAZPI CITY- Pabor an dating hepe kan Public Security Office na si Mendio Opracio sa nagin desisyon ni Legazpi City Mayor Noel Rosal na pagterminate sa gabos na empleyado kan opisina.
Sinabi ni Opracio na pigrerespeto ninda an memorandum na ipinaluwas kan alkalde kun sain kinanselar an kontrata kan 86 na trabahante kan security office.
Aram nya suboot na para ini sa pag “level up” kan opisina ngani na magin world class urog pa suboot na nagin Regional Peace and Order Council Chairman si Rosal kun kaya mawot kaini na enot na mangyari an paz y orden sa sadiring lugar.
Dugang pa ni Opracio, dae man ninda pwedesir na kontrahon an ipinaluwas na desisyon huli ta inadalan ining marhay kan alkalde maski pa namumundo an mga empleyado huli ta nagin honesto man an iba sa serbisyo.
Tama suboot an lakdang na ini na dae ini nin kasalak na pulitika.
Aminado an dating opisyal kan PSO na igwa mga pasaway na security officer na nakakadamay sa mga tultol.
Nangyari suboot an meeting kasuudma kun sain mismong si Rosal an nag-anunsyar asin nag-eksplikar sa mga ini kun nata kaipuhan na i-terminate an saindang kontrata.
Mientrastanto, maogmang ipigheras ni Opracio na sya na an magigin bagong opisyal na tagapagtaram kan alkalde asin marepresentar digdi sa mga meeting sa Manila.
