LEGAZPI CITY – Pinakusog pa kan Philippine Drug Enforcement Agency (PDEA) Bicol an koordinasyon sa Civil Aviation Authority of the Philippines (CAAP) asin Philippine Air Force (PAF) sa obhetong mapuho an paglaog kan mga kontrabando sa Pilipinas.
Pagbubuyagyag ni PDEA Bicol Dir. Christian Frivaldo sa intrevista kan Bombo Radyo Legazpi, sinugo an regional office ni Dir/Gen. Aaron Aquino sa pag-iimbestigar sa pag-aram kun sain hale an mga naglulutangan na cocaine bricks sa Philippine seas.
Segun sa sarong confidential source, posibleng hale an mga ini sa mga ipigbabagsak kan drug smugglers sa paagi kan sea planes alagad an iba an napapadpad sa ibang lugar na narerekober man kan mga parasira.
Hale man suboot an nasabing source sa organisasyon na nagagamit kan kaparehong modus.
Sa presente, nakapag-secure naman an PDEA sa small planes na nago-operate sa Bicol asin obhetong makaguno nin datos sa posibleng pribadong base na pigagamit na bagsakan kan mga shipment kan drug smugglers.
Apelar man kan PDEA sa CAAP asin PAF an pag-asister sa beripikasyon sa private airspace kan mga bako rehistradong eroplano maging sa mga dark flights na nagdadara kan illegal cargoes.
