LEGAZPI CITY-Nangapudan si Department of Agriculture Secretary Francisco Tiu Laurel, Jr. sa gabos na mga paraoma sa bilog na nasyon, lokal na gobyerno sa kada rehiyon, asin magin sa lambang ordinaryong namamanwaan na magpartisipar asin magtabang sa pagmonitor kan mga pigsasagibong farm-to-market roads (FMR) sa manlaen-laen na parte kan nasyon.
Ini ngani masierto na an mga imprastrakturang ini an tama asin honesto an pagkagibo ngani makatabang sa pag-uswag kan agrikultura.
Sa presente, pinaghahandaan man kan ahensya an paglansar nin sarong espesyal na plataporma na pigaapod nindang “FMR Watch”.
An inisyatiba na ini may katuyuhan suboot na tawan nin kapangyarihan an publiko na magin parte kan pagmonitor kan mga farm-to-market roads.
Sa paagi suboot kan nasabing plataporma na an siisay man gikan sa publiko pwedisir na mag-upload nin mga retrato na nagpapahiling kan presenteng estado kan konstruksyon, magsumiter nin mga report sa pag-uswag kan proyekto, asin magtao nin mga patanid o magreport nin anuman na mga isyu o problema na saindang nahihiling mismo sa mga lugar nin konstruksyon.
Tinawan nin duon man kan kalihim an importansya kan mahiwas na partisipasyon kan publiko para sa pagbabantay kan mga farm-to-market roads sa nacion.
