LEGAZPI CITY – Ipigkondusir kan Commission on Elections Bicol an connectivity test sa enterong rehiyon bilang preparasyon kan nagdadangadang na 2025 National and Local Elections.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na nahiling na ninda an mga lugar na igwang maluyang signal kun kaya nakapreparar na sinda para sa posibleng pagkonektaran.
Nakipag-koordinar na man sinda sa sarong service facility nganing magbugtak nin starlink wifi sa mga nagkapirang lugar sa rehiyon na may maluyang internet connectivity.
Pigsyerto niya man na bubugtakan man kan nasabing wifi bilang pasiguro an gabos na mga canvassing centers sa kabikolan maski igwa na ninda stable na mga signal sa mga nagkapira digdi.
Pigtaram pa kan opisyal na igwa man sindang contingency plan kun sain papangenotan kan Department of Science and Technology (DOST) asin Department of Information and Communications Technology (DICT) an saindang technical hub enkaso suboot na magkaproblema an gabos na ACM na piggamit sa pirilian.
Mientrastanto, padagos man an pigsasagibo nindang training sa mga DESO Technical Support Staff asin isusunod na an training sa mga electoral boards sa masunod na bulan.
Pigdugang man ni Atty. Valeza na piglalaoman nindang makakabot sa rehiyon an labi 3,000 na mga Automated Counting Machine (ACM) sa katahawan kan Abril mantang naresibi na ninda an gabos na mga balot boxes na gagamiton kan mga botante sa Bicol sa 2025 midterm elections.
