Nag-activate na an Coast Guard District Bicol o CGDBCL kan saindang Deployable Response Group o DRG komo pagpreparar sa posibleng epekto kan Super Typhoon Rosal sa Bicol Region.
Segun kay LTJG Allyssa Novie Bermal, PIO kan CG District Bicol, padagos an preparasyon kan Coast Guard sa paagi nin close coordination sa iba pang ahensya.
Mahigot nindang pigmo-monitor an kondisyon kan panahon asin kan dagat sa bilog na rehiyon.
Naka-alert status na man an gabos na Coast Guard units sa Bicol tanganing tulos makaresponde.
Sinegurar nindang preparado na an mga personnel, kagamitan, asin search and rescue teams kun kinakaipuhan.
Sa ngonian, igwa sindang 188 deployable personnel na handa nang magresponde sa anumang emerhensya.
Kaibahan pa digdi an 10 land assets asin 27 floating assets na nakapreparar na.
An mga ini naka-deploy na sa manlaen-laen na istasyon sa bilog na rehiyon.
Mahigot man na pigpapatupad kan Coast Guard an maritime safety guidelines kabali an paghihigpit sa paglayag.
Nagpaluwas na man sinda nin travel advisory kan Martes, Oktubre 19, sa Catanduanes makalihis itaas an Tropical Wind Signal No. 1 sa probinsya.
