Inakusaran kan China an Pilipinas asin Estados Unidos nin pigpapalala kan tensyon sa West Philippine Sea.
Sa isinagibong Shangri-La defense forum sa Singapore, sinabi ni Chinese Defense Minister Dong Jun na piggagamit kan Pilipinas asin Estados Unidos an isyu sa agawan nin teritoryo sa West Philippine Sea ngani na palalaon an sitwasyon asin raoton an saindang imahe.
Nanindugan an Chinese official na dae suboot tutugotan kan saindang gobyerno an mga siring na aktibidad na nakakaraot sa katoninongan sa rehiyon.
Nangapudan pa ini sa Estados Unidos na irespeto an saindang deretso sa mga pinag-aagawang teritoryo.
Nakahanda man suboot an China na makipagtabangan ngani na mamantinir an katoninongan bako sana sa West Philippine Sea alagad maging sa Taiwan.
Nag-atindir man sa nasabing aktibidad si Presidente Ferdinand Bongbong Marcos Jr. kung sain nanindugan ini na an Pilipinas an totoong nakakasakop sa nasabing parte kan kadagatan basado sa international law asin sa naging desisyon kan Permanent Court of Arbitration kan taong 2016.
