LEGAZPI CITY – Nagsagibo na nin pagbisita an gobernador kan Catanduanes sa ofisina kan Department of Public Works and Highways nganing mag-follow up kan mga piggigibong proyekto sa provincia.
Segun ki Catanduanes Governor Patrick Azanza sa intrevista kan Bombo Radyo Legazpi na personal niyang pighagad an mga datos manungod sa mga flood control asin flood mitigation siring man an mga seawall na ipigtugdok sa lugar kasunod kan mga ipigbuyagyag ni Presidente Ferdinand Marcos Jr. mapadapit sa mga “ghost” flood control projects.
Nagkasundo man sinda kan DPWH na sabay na magsasagibo nin monitoring asin inspection sa gabos na itinugdok na proyekto sa lugar partikular na an mga ongoing asin completed partikular na an narisa niya na saro sa mga ginibong seawall an medyo sadit an bakal na ginamit.
Mawot niya man ipatanggal kan Presidente an pig-aapod na “parking fee” sa mga proyekto na nakakaraot sa programa huli ta pigtatapyasan nin 5% sagkod 6% an kabilugang kantidad kan pondo na nagigin lagay sa mga politiko na nakakasakop sa lugar.
Pigtaram pa kan Gobernador na dapat tawan sinda nin direchos kan DPWH na pirmahan kun dapat magsagibo nin siring na mga proyekto o maski road re-blocking huli ta sinda an magigin apektado nganing maanalisar man ninda kun talagang tama ining gibuhon.
Suspetsya niya man na aram kan mga kongresista an mga ipigbabagsak na pondo huli ta nag-aagi an mga ini sa General Appropriations Act mantang nangyayari sana an pag-oolay mapadapit sa proyekto sa pagultangan kan mga congressman asin DPWH asin dae pighahagad an komento kan gobernador o maski alkalde kan lugar.
Pakaraw niya man na sinabi na posibleng allergic saiya an mga dae na pinangaranan na indibidwal asin grupo huli ta hihimayon niya kun tama an pagkakagamit kan pondo asin detalye kan mga proyekto.
Bukas loob man si Governor Azanza na makipag-kooperar sa Presidente enkasong paapodan sinda para sa pagsasagibo nin imbestigasyon manungod sa katiwalian sa mga flood control projects kan gobierno.
