LEGAZPI CITY—Posible suboot na mauli sa pagkalibong sa Senado en kaso na liwat na madagos an blue ribbon committee hearing ngunyan na aldaw, makalihis an pagkaelihir ni Senator Win Gatchalian bilang Senate Pro Tempore asin an nagin pahayag ni Senator Alan Peter Cayetano na siya man giraray an Senate President.
Segun ki Prof. Dennis Coronacion sarong political analyst, sa intrevista kan Bombo Radyo Legazpi, kun dae mapupugulan asin madagos an imbestigasyon an digdi makukwestiyon kun lehitimo an nasabing lakdang magin an sa committee chairpersons.
Nangyari na man suboot an siring na sitwasyon kan sa Kamara kan House Speaker si Cayetano asin an maribay saiya na si Lord Allan Velasco, kun sain nagkagirian an duwang lehislador hasta sa magsurender na sana si Cayetano na itao an liderato ki Velasco sagkod na nakiaram na an ehekutibo sa paagi ni dating Presidente Rodrigo Roa Duterte.
Dugang pa kaini na dae niya aram kun anong government branch ngunyan an ma-mediate nganing maresolbaran an nasabing isyu sa Senado.
Ipigdoon man ni Coronacion na bako magigin magayon an epekto kan nagkapirang senador na namamangka sa dalawang ilog huli sa dae ninda magagampanan an mandato sa publiko asin mas pigtawan pang atensyon an pamumulitika.
