LEGAZPI CITY- Piglinaw kan lokal na gobyerno kan Legazpi na wara pang occupancy permit an CAL Courtyard building sa Barangay Pinaric Old Albay District, Legazpi City kun saen nangyari an pagsabog huli sa suboot gas leak na ikinagadan kan sarong biktima asin lugadan an nasa labi 30 persona, kan nakalihis na Sabado.
Segun kay Legazpi City Mayor Geraldine Rosal, dae pa na inspeksyon kan Bureau of Fire Protection an nasambitang establisyemento kun saen nagpapadagos pa suboot an aplikasyon kaini ngane na makakua nin permit.
Dugang pa kan opisyal na pati an mga nagkapirang tenants o stalls kan building an wara pa man suboot na mga magkakanigong business permit.
Pigduon kaini na kinakaipuhan na maging strikto na an lokal na gobyerno sa paghagad nin mga permit sa mga business establishments ngane na maibitaran an mga kaparehong insidente.
Mientrastanto, binisita naman kan opisyal an mga naging biktima kan pagsabog na dinara sa ospital maging an pamilya kan saro sa binawian nin buhay asin pigtawan nin magkakanigong asistensiya.
Abiso man kaini sa mga negosyante na maging responsable sa pagsumitir nin mga rekisitos asin dae maggamit nin mga substandard na mga kagamitan para sa kaligtasan kan mga kostumer.
Mientrastanto, pigbabalo pa man kan Bombo Radyo Legazpi na makua an lado kan manhamiento kan CAL Courtyard.
