LEGAZPI CITY-Dae na bubuksan kan Commission on Elections (COMELEC) an filing period para sa Certificates of Candidacy (COC) para sa Barangay asin Sangguniang Kabataan Elections (BSKE) kun magin ley an bill na nag-oktaba kan pirilian bago an Setyembre 28.
Segun ki COMELEC Chairman George Erwin Garcia, nakatalaan an pag-file kan COCs poon Setyembre 28 hasta Oktubre 5 para sa pirilian sa Nobyembre 2.
Alagad kun magin ley an lakdang makalihis na magpoon na an filing period, tulos na sususpendiron kan COMELEC an proseso.
Aminado si Garcia na nasa precarious position an COMELEC dapit sa preparasyon sa pirilian huli ta, dawa magin ley an pag-oktaba, pwedisir pa man giraray ining hamanon sa Korte Suprema.
Sa ibong kaini, nagpapadagos an COMELEC sa preparasyon para sa pirilian sa Nobyembre 2 mantang wara pang ley na nag-ooktaba kaini.
Kabale sa mga preparasyon na ini an pagdeploy kan mga materyales asin kagamitan sa eleksyon sa mga harayong lugar, na piglalaoman na mapoon sa enot na semana kan Oktubre.
Maabot na man P8 bilyon an nagastos na kan COMELEC sa preparasyon kan BSKE.
Sinabi ni Garcia na yaon sa Kongreso an desisyon kun ipapadagos o ipagpaliban an eleksyon, mantang an mandato ninda an mag-implementar kan ano man na ley na ipapaotob.
Nangapudan man ini sa publiko na dae basta-basta magtubod sa mga nagkakalat online na kanselado na an November 2 BSKE.
Tinawan duon man niya na sagkod na dai pa maipapasar an ley na nag-ooktaba kan pirilian, sa Nobyembre 2 nagtetenir na nakatalaan na aldaw nin pirilian.
Kun naisabatas na an propwesto, an masunod na BSKE ililipat sa ikaduwang Lunes kan Nobyembre 2028.
