LEGAZPI CITY – Nakabandera an red alert status kan Bureau of Fire Protection katakod kan nagdadangadang na semana santa.
Segun ki Bureau of Fire Protection Albay Provincial Fire Marshall Fire Superintendent Jerickson Miraflor sa intrevista kan Bombo Radyo Legazpi na pinag-aantisiparan ninda an pag-uli asin pag-abot kan kadakol na mga turista asin bisita sa provincia.
Ipiglatag na ninda an oplan semana santa nganing magtaong seguridad asin asistensya sa mga biyahero sa mga pantalan, terminal asin kakalsadahan sa Albay.
May nakastandby man sa saindang personahe sa mga simbahan na dadagsaon man kan mga deboto asin mga bisita na nag-visita Iglesia.
Pigtaram pa kan opisyal na dae man malikayan na may mga pamilya na nagtitipon asin nagpapasyar sa mga pamosong lugar sa provincia kun kaya gigibuhon ninda an gabos nganing masyerto an saindang kaligtasan.
Dae man tutugutan na magleave an saindang personel sa mantang nakabandera an saindang red alert status afuera na sana suboot kun kinakaipuhan.
Pigmamawot niya man na dae madakol an insidente nin kasulo tuyong lenten season kun kaya mahigot nindang pigpapagirumdom na dae pagpabayaan na nakasaksak an saindang mga appliances partikular na kun mahali an mga ini.
Pagsyerto ni Miraflor na bukas ano mang oras an hepatura kan Bureau of Fire Protection Albay nganing magtaong asistensya sa publiko ngonian na aldaw kan semana santa.
