LEGAZPI CITY-Tinawang-duon ni House Prosecution Spokesperson asin Lanao del Sur Rep. Zia Alonto Adiong na an selyadong BIR box na may laog na income tax returns asin iba pang financial records an posibleng magin pinaka-importanteng ebidensya sa impeachment trial ni Bise Presidente Sara Duterte.
Sinabi pa kaini na importante ini ngani ma-verify an alegasyon nin dae maipaliwanag na yaman sa paagi kan pagkumparar kaini sa SALN kan Bise.
Nanindugan si Adiong na parte sana kan pag-imbentaryo asin pagmarka kan mga dokumento an pagbukas kan kahon asin dae automatic na nangangahulugan na aakoon ini bilang ebidensya, alagad mantenidong kontra sa lakdang na ini an kampo ni Duterte.
Mientrastanto, an tagapagtaram kan depensa na si Atty. Michael Poa, nanindugan na amay pa para husgahan an bagay na ini huli ta an Senate Impeachment Court sana an may kapangyarihan na magdesisyon sa mga mosyon kan mag-ibong na lado, asin dapat na tawan nin tsansa an depensa na magsimbag antes pa man maipaluwas sa publiko an anuman na konklusyon.
Idinagdag kan depensa na an gabos na bagay na may kinaaraman sa BIR box dapat mag-agi sa tamang proseso kan korte.
Sa ngonian, nagtitinir an nasabing box sa kustodiya kan impeachment court mantang pighahalat an desisyon kun aakoon ini bilang opisyal na ebidensya sa paglilitis.
An isyung ini piglalaoman na magiging sentrong tema nin diskusyon sa mga masunod na yugto kan impeachment trial ni Vice Presidente Sara Duterte.
