LEGAZPI CITY – Sinimbag kan Legazpi City Public Safety Office an mga komento sa social media kontra sa traffic rerouting sa Bitano, Legazpi City, huli sa ginigibong drainage sa may riles.
Segun ki PSO Head Octavio Rivero, sa intrevista kan Bombo Radyo Legazpi, ikaapat na aldaw na kan rerouting ngonian na Sabado, Nobyembre 14, asin nama-manage man an daloy kan trapiko.
Pigpaliwanag niya na tinututukan ninda an crossing sagkod sa may Citi Plus asin likod kan Gaisano, kun sain ginibong one way an likod kan Gaisano tanganing dai magsabatan an mga behikulo na nagkakawsa nin traffics, mantang two way an crossing asin maging sa atubangan kan Legazpi Philippine National Police (PNP).
Inako man ni Rivero na nagluluya an dalagan kan mga behikulo pag nag-uuran huli ta inaanod an daga harani sa pigkakalot na drainage, na minsan nagigin kawsa suboot kan pagtagilid kan mga tricycle sa hararom na pag-ultanan kan riles.
Huli kaini, ibinuhos an gabos na public safety personnel sa may Citi Plus, SM, likod kan Gaisano, asin atubangan kan Yashano Mall, asin nagdugang man nin mga signage.
Nangapodan si Rivero sa mga motorista na sundon an mga signage asin dai mag-park sa mga pinagbabawal na lugar tanganing tuloy-tuloy an biyahe asin malikayan an halangkaw na penalty.
